Indigestion
Indigestion (အစာမကြေခြင်း)
🔺အစာမကြေဖြစ်တယ်ဆိုတာ အစာအိမ်နေရာ (များသောအားဖြင့် ရင်ညွန့်နေရာ) မှာ အစာ ရှိသည်ဖြစ်စေ၊ မရှိသည်ဖြစ်စေ မအီမသာဖြစ်နေတာမျိုးပါ။ ရောဂါတစ်ခုဆိုတာထက် ဗိုက်နာခြင်း၊ အစာနည်းနည်း စားရုံနဲ့ ဗိုက်ပြည့်ခြင်း၊ ရင်ပြည့်ရင်ကယ်ဖြစ်ခြင်း စတဲ့ လက္ခဏာတွေကို ခံစားရတဲ့ ကျန်းမာရေးအခြေအနေ တစ်ခုလို့ သတ်မှတ်ရမှာပါ။ အစာမကြေဖြစ်တာဟာ တခြားသော အစာအိမ်နဲ့ အူလမ်းကြောင်း ရောဂါတွေရဲ့ လက္ခဏာတစ်ခုလဲ ဖြစ်နိုင်ပါတယ်။ အစာမကြေခြင်းဟာ ဖြစ်လေ့ဖြစ်ထရှိတဲ့ ရောဂါလက္ခဏာတစ်ခုပေမယ့် တစ်ယောက်နဲ့ တစ်ယောက် ခံစားရပုံခြင်း အမြဲ မတူပါဘူး။ ပုံမှန်အားဖြင့် အစာမကြေဖြစ်တာကို အစားအသောက်ပုံစံ၊ လူနေမှုဘဝပုံစံပြောင်းလဲတာနဲ့ ဆေးအကူအညီယူပြီး သက်သာအောင်လုပ်လို့ပါတယ်။
🔺️အစာမကြေတဲ့အခါအဖြစ်များတဲ့ လက္ခဏာတွေကတော့-
၁။ ဘာမှမစားရဘဲနဲ့ ဗိုက်ပြည့်နေတာ
၂။ အစာစားပြီး မအီမသာဖြစ်နေတာ
၃။ ဗိုက်အထက်နားက တင်းကျပ်နေပြီး နာနေတာ
၄။ ပျို့အန်ချင်နေတာ တို့ဖြစ်ပါတယ်။
🔺အစာမကြေခြင်းကို ဖြစ်စေနိုင်တဲ့ အကြောင်းအရင်းတွေကတော့-
၁။ အစာစားတာများခြင်း သို့မဟုတ် အစာမြန်မြန်စားခြင်း
၂။ ဆီများသော၊ အစပ်များသော အစားအစာများစားခြင်း
၃။ ဆေးလိပ်သောက်ခြင်း
၄။ စိုးရိမ်ပူပန်မှုများခြင်း
၅။ အကိုက်အခဲပျောက်ဆေးများနှင့် သံဓာတ်ပါသောအားဆေးများသောက်ခြင်း
၆။ အစာအိမ်ရောင်ခြင်း၊ ဝမ်းချုပ်ခြင်း၊ Pancreas (ပန်ကရိယ) ရောင်ခြင်း၊ အစာအိမ်ကင်ဆာ၊ ကိုယ်ဝန်ရှိခြင်းနှင့် ဆီးချိုရောဂါကဲ့သို့ ရောဂါများဖြစ်ပါတယ်။ ရံဖန်ရံခါမှာ နှလုံးသွေးကြော ကျဥ်ခြင်း/ပိတ်ခြင်း လက္ခဏာများကြောင့်လည်း အစာမကြေခြင်းကို ခံစားရတတ်ပါတယ်။
🔺များသောအားဖြင့် မပြင်းထန်တဲ့ အစာမကြေခြင်းကိုတော့ နေထိုင်မှုပုံစံကို ပြောင်းလဲခြင်းအားဖြင့် သက်သာအောင်လုပ်လို့ရပါတယ်။
▪️အစားအသောက်တွေကို နည်းနည်းချင်းစီနဲ့ မကြာခဏ စားပေးပါ။ အစာကို ဖြည်းဖြည်းချင်း သေချာဝါးစားပါ။
▪️အဆီများပြီး စပ်တဲ့အစားအသောက်တွေ၊ ပြုပြင်ထားတဲ့ အစားအသောက်တွေ၊ ကာဗွန်နိတ်အဖျော်ယမကာတွေ၊ ကဖိန်းဓာတ်၊ အရက်နှင့် ဆေးလိပ်သောက်ခြင်းတို့ဟာ အစာမကြေခြင်းကို ဖြစ်စေတာကြောင့် တတ်နိုင်သလောက် ရှောင်ကြဥ်ပါ။
▪️ကျန်းမာတဲ့ ကိုယ်အလေးချိန်ကို ထိန်းသိမ်းထားပါ။ ပိုလျှံနေတဲ့ ကိုယ်အလေးချိန်ပေါင်များဟာ ဝမ်းဗိုက်ကို ဖိအားဖြစ်စေပြီး အစာအိမ်ကို အထက်သို့ တွန်းပို့ကာ အစာအိမ်ထဲက အက်စစ်ဓါတ်တွေကို အထက်မှာရှိနေတဲ့ အစာမျိုပြွန်အတွင်း စုပုံလာစေတာကြောင့်ပါ။
▪️လေ့ကျင့်ခန်းပုံမှန်လုပ်ပါ။ လေ့ကျင့်ခန်းလုပ်တာက ကိုယ်အလေးချိန်ပိုကျစေပြီး အစာခြေစနစ်ကို ပိုကောင်းစေပါတယ်။
▪️စိတ်ဖိစီးမှုကို လျှော့ချပါ။ ထမင်းစားချိန်မှာ သာယာတဲ့ ပတ်ဝန်းကျင်ကို ဖန်တီးပါ။ အသက်ပြင်းပြင်းရှူခြင်း၊ တရားထိုင်ခြင်း သို့မဟုတ် ယောဂကဲ့သို့သော အပန်းဖြေနည်းများကို လေ့ကျင့်ပါ။ ကိုယ်ကြိုက်နှစ်သက်တဲ့အရာတွေကို လုပ်ရင်း အချိန်ဖြုန်းပါ။ များများအိပ်ပါ။
▪️ဆရာဝန်ရဲ့ ခွင့်ပြုချက်ကိုယူပြီး အစာအိမ်နံရံကို ထိခိုက်စေနိုင်တဲ့ အကိုက်အခဲပျောက်ဆေးများ သို့မဟုတ် အခြားဆေးများကို ဖြတ်ပါ သို့်မဟုတ် ပြောင်းလဲပါ။ ရွေးချယ်စရာမရှိဘူးဆိုရင်တော့ အဲဒီဆေးတွေကို အစာနဲ့တွဲသောက်ပါ။
အစာမကြေခြင်းကို ကာကွယ်ဖို့ဖြစ်စေ၊ သက်သာစေဖို့ဖြစ်စေ ဒီနည်းလမ်းလေးတွေကို လိုက်နာသင့်ပါတယ်။
🔺ပြင်းထန်မှုမရှိတဲ့ အစာမကြေခြင်းဟာ များသောအားဖြင့် စိုးရိမ်စရာမရှိပါဘူး။ ဒါပေမယ့် နှစ်ပတ်ထက်ပိုပြီး အဆင်မပြေ ဖြစ်နေမယ်ဆိုရင်တော့ ဆရာဝန်နှင့် တိုင်ပင်ပါ။
▪️မရည်ရွယ်ဘဲ ကိုယ်အလေးချိန်ကျခြင်း သို့မဟုတ် အစာစားချင်စိတ် ဆုံးရှုံးခြင်း
▪️ထပ်ခါထပ်ခါ အန်ခြင်း သို့မဟုတ် အန်တဲ့အခါ သွေးပါခြင်း ၊ကော်ဖီနှစ်ကဲ့သို့ အညိုရောင် အမဲရောင်များအန်ခြင်း
▪️ဝမ်းမည်းမည်းသွားခြင်း သို့မဟုတ် ဝမ်းချုပ်ခြင်း
▪️အစာမျိုရခက်သည်မှာ တဖြည်းဖြည်း ပိုဆိုးလာခြင်း
▪️သွေးအားနည်းခြင်းကို ညွှန်ပြနေတဲ့ ပင်ပန်းနွမ်းနယ်ခြင်း၊ အားနည်းခြင်းတို့ဖြစ်ခြင်း
အောက်ပါလက္ခဏာများဖြစ်ပေါ်လာပါက ဆေးကုသမှု ချက်ခြင်းခံယူသင့်ပါတယ်။
▪️အသက်ရှုကြပ်ခြင်း၊ ချွေးထွက်ခြင်း၊ ရင်ဘတ်အောင့်ပြီး နာကျင်မှုက မေးရိုး၊ လည်ပင်း၊ လက်တို့အထိ ပျံ့နှံ့လာခြင်း
▪️အားစိုက်ရတဲ့အခါမှာ ရင်ဘတ်အောင့်လာခြင်း
နာကျင်မှုပြင်းထန်လာလျှင် သို့မဟုတ် နာကျင်မှုနဲ့အတူအထက်ပါလက္ခဏာတွေပါ ဖြစ်ပေါ်လာတယ် ဆိုရင်တော့ ဆရာဝန်ဆီကို ချက်ချင်း သွားရောက်ပြသသင့်ပါတယ်။
Comments
Post a Comment